Duşenbe güni Türkmenistan bilen Eýran Lotfabad serhet terminalynyň maslahatlar zalynda ulag we gümrük hyzmatdaşlygy meselelerine bagyşlanan bilelikdäki mejlisi geçirdiler. Duşuşygyň dowamynda taraplar ýük daşamalaryny ýönekeýleşdirmek hem-de serhetýaka ugurlarda hyzmatdaşlygy ösdürmek boýunça çäreleri ara alyp maslahatlaşdylar.

IRNA agentliginiň habar bermegine görä, mejlise Türkmenistanyň Döwlet gümrük gullugynyň, “Turkmen Logistics” döwlet kompaniýasynyň, Türkmenistanyň ulag ulgamynyň hem-de Türkmenistanyň Serhet gullugynyň ýolbaşçy düzümleriniň wekilleri gatnaşdylar.

Mejlisiň gün tertibine ulag hereketiniň ugurlaryny sazlamak, serhetde iki zolakly hereketi guramak, şeýle-de bu geçelge arkaly ýolagçy gatnawlarynyň işjeňligini artdyrmak bilen bagly meseleler girizildi.

Eýran tarapy soňky üç ýylyň dowamynda ýük dolanyşygynyň durnukly ösýändigini belläp, üstaşyr ýük daşamalarynyň möçberini 20 million tonna çenli ýetirmek maksady bilen geçiriş nokadynyň geçirijilik ukybyny artdyrmagyň zerurdygyny aýtdy.

Şeýle-de Türkmenistan bilen Eýran Yslam Respublikasynyň serhet gulluklarynyň wekilleri Sarahs serhet geçelgesinde duşuşyk geçirip, bu geçelge arkaly üstaşyr ýük daşamalarynyň möçberini artdyrmak barada ylalaşyga geldiler.