Türkmenistanyň Statistika baradaky döwlet komitetiniň hünärmenleri Beýik Britaniýadan we Merkezi Aziýanyň ýurtlaryndan gelen kärdeşleri bilen bilelikde migrasiýa statistakasyny dolandyrmakda, zähmet bazaryna täsirini bahalandyrmakda hem-de statistikany ulanyjylara görä uýgunlaşdyrmakda öňdebaryjy tejribeleri öwrenmek boýunça çära gatnaşdylar.

Beýik Britaniýanyň hökümeti hem-de EGED Maksatnamasy tarapyndan guralan bu çäre Türkmenistanyň, Gazagystanyň, Gyrgyzystanyň, Täjigistanyň we Özbegistanyň döwlet statistika gulluklarynyň wekillerini bir ýere jemledi. Bu barada Beýik Britaniýanyň Türkmenistandaky ilçihanasy sişenbe güni habar berdi.

Duşuşygyň çäklerinde Merkezi Aziýanyň her bir ýurdy britan kärdeşleri bilen ikitaraplaýyn gepleşikleri geçirip, statistika ulgamynda hyzmatdaşlygy giňeltmek we gatnaşyklary pugtalandyrmak meselelerini ara alyp maslahatlaşdy.

EGED (“Ykdysady ösüş üçin netijeli dolandyryş”) maksatnamasy Beýik Britaniýanyň hökümeti tarapyndan maliýeleşdirilýän bäş ýyllyk taslama bolup, onuň baş maksady Merkezi Aziýanyň ýurtlarynda ykdysady syýasatyň netijeliligini, statistik hasabatlylygy kämilleşdirmekden ybaratdyr.