29-njy sentýabrda Kiýewde Türkmenistanyň Ukrainadaky Ilçisi Toýly Ataýew Ukrainanyň Daşary işler ministriniň orunbasary Aleksandr Mişenko bilen duşuşdy. Duşuşykda türkmen kärhanalarynyň Ukrainanyň bazarynda, ukrain kärhanalarynyň bolsa Türkmenistanda iş alyp barmaklary üçin goldaw bermek meselelerine aýratyn üns berildi.

Gepleşikleriň dowamynda taraplar syýasy, ykdysady, medeni we ynsanperwer ugurlarda hyzmatdaşlygy ösdürmek, şeýle hem iki ýurduň halkara guramalarynyň çäklerindäki gatnaşyklary bilen bagly meseleleri ara alyp maslahatlaşdylar. Şeýle hem, syýasy geňeşmeleriň geçirilmegine degişli tekliplere aýratyn üns berildi. Bu barada Türkmenistanyň Ukrainadaky ilçihanasy habar berdi.

Taraplar söwda-ykdysady gatnaşyklaryň durnukly häsiýete eýedigini nygtap, söwda gatnaşyklaryny giňeltmäge taýýardygyny beýan etdiler.
Duşuşygyň ahyrynda Aleksandr Mişenko, Türkmenistanyň Garaşsyzlyk güni mynasybetli, Ukrainanyň DIM-niň ýolbaşçylarynyň adyndan Gutlag hatyny Toýly Ataýewe gowşurdy.

Türkmenistan bilen Ukrainanyň arasyndaky diplomatik gatnaşyklar 1992-nji ýylyň 10-njy oktýabrynda ýola goýuldy.