Türkmenistanyň Prezidenti Serdar Berdimuhamedow penşenbe güni sanly ulgam arkaly geçirilen Ministrler Kabinetiniň nobatdaky mejlisinde Turkmenistanyň Garaşsyzlyk baýramy mynasybetli iş kesilen 225 sany raýatyň  günäsini geçmek hakynda Permana gol çekdi.

Jenaýat edendikleri üçin iş kesilen we eden etmişlerine ökünip, ak ýürekden toba gelen raýatlaryň günäsi geçirilip, olary jeza çekmekden boşatmak ýaly sahawatly çäreler yzygiderli amala aşyrylýar. Bu barada Türkmenistanyň resmi metbugaty habar berýär.

Günäsi geçilen raýatlar barada Döwlet howpsuzlyk geňeşiniň sekretary, Türkmenistanyň Prezidentiniň ýanyndaky Raýatlyk we günä geçmek meseleleri boýunça teklipleri taýýarlamak baradaky toparyň başlygy Begenç Gündogdyýew hasabat berdi.

Döwlet baştutany hasabaty diňläp, toparyň başlygyna hukuk goraýjy edaralaryň ýolbaşçylary bilen bilelikde günäsi geçilen adamlary tussaglykdan boşadyp, olaryň ýakyn wagtda öz öýlerine, maşgala agzalarynyň arasyna barar ýaly, ähli zerur işleri geçirmegi tabşyrdy.

Türkmenistanyň Prezidenti tussaglykdan boşadylan raýatlara, eziz Watanymyza ak ýürekden hyzmat etmegi, halal zähmet çekmegi we öz zähmetleriniň hözirini görüp ýaşamaklaryny arzuw etdi.

Ministrler Kabinetiniň mejlisinde döwlet durmuşynyň beýleki birnäçe meselelerine garalyp geçildi.