Türkmenistan bilen Gruziýa iki ýurduň arasynda berk dostluk däplerine we netijeli hyzmatdaşlyga esaslanýan dokumental film surata düşürmekçi. Bu barada Türkmenistanyň Gruziýadaky Ilçihanasy habar berýär.

Film döretmek meselesi Türkmenistanyň Gruziýadaky ilçisi Dowletmyrat Seýitmämmedowyň meşhur gruzin režissýory Tengiz Malaniýa bilen Tbiliside geçirilen duşuşygynda ara alnyp maslahatlaşyldy.

Gruziýanyň Medeniýet ministrliginiň goldawy bilen durmuşa geçiriljek film, Türkmenistan bilen Gruziýanyň syýasy, söwda-ykdysady, ulag-energetika hem-de medeni-ynsanperwer ugurlarda gazanan üstünliklerini giňden açyp görkezmegi maksat edinýär.

Duşuşykda diplomat Türkmenistanda giň göwrümde geçirilýän halkara çäreleri, aýratyn-da Türkmenistanyň hemişelik Bitaraplygynyň 30 ýyllygyna hem-de 2025-nji ýylyň ‘Halkara parahatçylyk we ynanyşmak ýyly’ diýlip yglan edilmegi mynasybetli geçirilen çäreler barada gürrüň berdi.

Taraplar bilelikdäki bu döredijilik taslamasynyň iki ýurduň arasyndaky gatnaşyklaryň berkidilmegine we täze başlangyçlaryň durmuşa geçirilmegine möhüm goşant boljakdygyna ynam bildirdiler.

Türkmenistan bilen Gruziýanyň arasyndaky diplomatik gatnaşyklar 1992-nji ýylyň 16-njy iýulynda ýola goýuldy. Şondan bäri ýurtlaryň arasynda ykdysadyýet, ulag, energetika, medeniýet we bilim ulgamynda hyzmatdaşlyk üstünlikli dowam edip gelýär.