Türkmenistanyň Prezidenti 2025-nji ýylyň 18-19-njy sentýabrynda “Awaza” milli syýahatçylyk zolagynda Türkmenistanyň maýa goýum forumyny geçirmek baradaky Karara gol çekdi. Forum ýurduň ykdysady kuwwatyny, maýa goýumlaryň netijeliligini ýokarlandyrmak, ykdysadyýetiň eksport mümkinçiliklerini artdyrmak, şeýle hem halkara hyzmatdaşlygy ösdürmek maksady bilen geçirilýär. Bu barada Türkmenistanyň resmi metbugaty anna güni habar berdi.

Resminama laýyklykda, Türkmenistanyň Maliýe we ykdysadyýet ministrligine we Daşary işler ministrligine maýa goýum forumynyň guramaçylykly hem-de ýokary derejede geçirilmegini üpjün etmek tabşyryldy. Forum ýurdumyzyñ esasy ykdysady ulgamlaryny — energetika, transport, sanly tehnologiýalar we oba hojalygy — öz içine alýan täze ykdysady başlangyçlary we maýa goýum taslamalaryny ýaýbaňlandyrmak üçin möhüm platforma bolar.

Bu giň möçberli maslahat, “Berkarar döwletin täze eýýamynyň Galkynyşy” döwründe ýurduň durnukly ykdysady ösüş strategiýasyna laýyklykda geçirilip, Türkmenistanyň dünýä ykdysady giňişligindäki işjeň ornuny has-da berkitmegi göz öňünde tutýar.

TIF 2025 — Türkmenistanyň Maýa goýum forumy häzirki zaman şertlerine laýyk enjamlaşdyrylan, Hazar deňziniň kenaryndaky “Awaza” milli syýahatçylyk zolagynyň Kongresler merkezinde geçiriler.