Türkmenistanyň Kabuldaky ilçisi Hoja Öwezow penşenbe güni Owganystanyň Söwda we senagat edarasynyň (ACCI) başlygy Saýed Mohammad Karim Haşemi bilen duşuşyk geçirdi. Duşuşykda iki ýurduň söwda gatnaşyklaryny ösdürmegiň meseleleri ara alnyp maslahatlaşyldy.

Owganystanyň Söwda we senagat edarasynyň habar bermegine görä, taraplar iki ýurduň önümlerini öňe sürmekde bilelikdäki sergileri geçirmegiň ähmiýetini bellediler.

Owganystanyň Söwda we senagat edarasy ýurduň esasy işewür birleşigi bolup, ýurduň işewürlerini birleşdirýär we olaryň bähbitlerini goramak bilen, söwda we maýa goýumlaryny çekmek, sergileri, işewür forumlary, duşuşyklary hem-de saparlary guramak bilen meşgullanýar.

Türkmenistan we Owganystan energiýa, söwda we ulag ulgamlarynda hyzmatdaşlygy giňeldýärler we serhetara taslamalary amala aşyrýarlar. Olar türkmen gazynyň we elektrik energiýasynyň Owganystana iberilmegi, şeýle hem elektrik geçiriji liniýalaryň we demir ýol bölekleriniň gurluşygyny öz içine alýar.