Türkmenistanyň Gruziýadaky Ilçisi Döwlet Seýitmämmedow 11-nji sentýabrda Suhumi döwlet uniwersitetiniň rektory Tea Jugeli bilen duşuşyk geçirdi. Duşuşykda Ýagşygeldi Kakaýew adyndaky Halkara nebit we gaz uniwersiteti bilen Suhumi döwlet uniwersitetiniň arasynda özara düşünişmek hakyndaky Ähtnamanyň gol çekmek meselesi hem-de uniwersitetleriň rektory derejesinde ikitaraplaýyn saparlary guramagyň mümkinçilikleri ara alnyp maslahatlaşyldy. 

Duşuşygyň dowamynda taraplar şeýle-de ýokary okuw mekdepleriniň we akademiki toparlaryň arasyndaky hyzmatdaşlygyň berkemegine ýardam etjek başlangyçlara üns berdiler. Bu barada Türkmenistanyň Gruziýadaky Ilçihanasy penşenbe güni habar berdi.

Ilçi duşuşygyň başynda rektory täze wezipesi bilen gutlap, onuň ýolbaşçylygynda ýokary okuw mekdebiniň üstünlikli ösdüriljekdigine ynam bildirdi. Ol Türkmenistanyň Ilçihanasy bilen Suhumi döwlet uniwersitetiniň arasynda bilim, ylym we medeni ugurlarda dowam edip gelýän hyzmatdaşlygyň ähmiýetini nygtady.

Türkmenistanyň Gruziýadaky Ilçisi Döwlet Seýitmämmedowyň Suhumi döwlet uniwersitetiniň rektory Tea Jugeli bilen duşuşygy, 2025-nji ýylyň 11-nji sentýabry (Surat: Türkmenistanyň Gruziýadaky Ilçihanasy)

Rektor Tea Jugeli bilelikdäki akademiki we medeni taslamalary ösdürmek boýunça başlangyçlary işjeň goldamaga taýýardygyny aýdyp, ýokary okuw jaýlarynyň arasynda gatnaşyklaryň giňeldilmeginiň Türkmenistan bilen Gruziýanyň arasyndaky hyzmatdaşlygy berkitjekdigini belledi.

2023-nji ýylda Ýagşygeldi Kakaýew adyndaky Halkara nebit we gaz uniwersiteti bilen Hytaýyň nebit uniwersitetiniň arasynda özara düşünişmek hakyndaky Ähtnama gol çekildi. Onuň çäginde mugallymlaryň taýýarlygy we hytaý dili boýunça ýörite okuwlar geçirilýär.