Türkmenistanyň Prezidenti Serdar Berdimuhamedow sişenbe güni Koreýa Halk Demokratik Respublikasynyň döredilen güni mynasybetli ýurduň Döwlet işleri boýunça Başlygy Kim Çen Yny we KHDR-nyň halkyny gutlady. Bu barada Türkmenistanyň resmi metbugaty habar berýär.

Gutlagda Prezident Serdar Berdimuhamedow Kim Çen Yna berk jan saglyk we bagtyýarlyk, ýurduň ähli halkyna bolsa parahatçylyk, abadançylyk hem-de rowaçlyk arzuw etdi.

Şol gün hem Türkmenistanyň Prezidenti Täjigistan Respublikasynyň Garaşsyzlyk güni mynasybetli Täjigistanyň Prezidenti Emomali Rahmony we ýurduň halkyny gutlady.

Gutlag hatynda soňky ýyllarda Täjigistanda durmuş-ykdysady abadançylygyň yzygiderli pugtalandyrylýandygy we  halkara gün tertibiniň möhüm meselelerini çözmekde eýeleýän ornunyň işjeň ýokarlanýandygyny belledi.

Serdar Berdimuhamedow Türkmenistanyň Täjigistan bilen ikitaraplaýyn hyzmatdaşlygy ösdürmek ugrunda tagallalary dowam etdirmäge taýýardygyny tassyklap, Emomali Rahmona tüýs ýürekden berk jan saglyk, bagtyýarlyk, Täjigistanyň doganlyk halkyna bolsa parahatçylyk, mundan beýläk-de ösüş hem-de rowaçlyk arzuw etdi.