Türkmenistan bilen Eýran demir ýol hyzmatdaşlygyny giňeltmek we üstaşyr ýük daşamalarynyň möçberini 20 million tonna çenli artdyrmak boýunça bilelikdäki çäreleriň meýilnamasyny taýýarlamagy ylalaşdylar. Bu barada duşenbe güni “Tehran Times” neşiri habar berdi.

Ylalaşyk 6–8 sentýabr aralygynda Türkmenistanyň demir ýol ulaglary ministri Mämmet Akmämmedowyň ýolbaşçylygyndaky wekiliýetiň Eýrana eden iş saparynyň dowamynda geçirilen duşuşyklarda gazanyldy. Eýran tarapyndan gepleşiklere ýurduň Ýol we şäher ösüşi ministri Farzane Sadeg we Eýranyň demir ýollarynyň başlygy Jabbar Ali Zakeri gatnaşdylar.

Taraplar demir ýol ugurlaryny ösdürmek meselelerini ara alyp maslahatlaşdylar. Hususan-da, Hytaý–Gazagystan–Türkmenistan–Eýran ugruna we “Aşgabat Ylalaşygy” halkara geçelgesine (Özbegistan–Türkmenistan–Eýran–Oman) aýratyn üns berildi. Şeýle-de, taraplar ykdysady hyzmatdaşlyk guramasyna (ECO) agza döwletleriň arasynda haryt dolanyşygyny ýokarlandyrmak we Ermenistan–Eýran–Türkmenistan–Gazagystan üstaşyr ulag geçelgesiniň mümkinçiliklerinden netijeli peýdalanmak ugrunda hyzmatdaşlygy giňeltmäge taýýardygyny beýan etdiler.

Saparyň çäginde türkmen wekiliýeti Tähranda ýerleşýän demirýol wagonlaryny dolandyryş merkezine hem-de “Aprin” gury portuna baryp gördüler. Şeýle hem, wekiliýet Akýaýla–Inçeburun demir ýol geçelgesindäki alnyp barylýan işleriň ýagdaýy bilen tanyşdy.

Mundan öň, Horasan demir ýolunyň baş müdiri Türkmenistanyň serhetindäki Sarahs şäherinde ýerleşýän demirýol geçelgesiniň gurluşygynyň tamamlaýjy tapgyrda alnyp barylýandygyny tassyklady.