Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugy Hazar deňzinde ösýän gyzylymtyl-goňur we gögümtil-ýaşyl suwotularyndan ýod hem-de polisaharidleri almagyň tehnologiýasyna awtorlyk hukugyny bellige aldy.

Bu ylmy açyş Türkmenistanyň Ylymlar akademiýasynyň Halkara ylmy-tehnologiýalar parkynyň biotehnologiýalar barlaghanasynyň hünärmenleri – Altyn Rahmanowa, Döwlet Gadamow we Aýna Aşyrowa tarapyndan taýýarlanyldy. Bu barada anna güni Türkmenistanyň resmi metbugaty habar berdi.

Suwotularyň biomukdaryndan alnan maddalar, şol sanda ýod we polisaharidler, ýokary özleşdiriş derejesi bilen tapawutlanýar. Organiki görnüşdäki ýoduň bioelýeterligi has ýokary derejede bolup, ol sintetiki görnüşlerinden tapawutlylykda organizm tarapyndan has gowy özleşdirilýär. Bu düzümler madda çalşygyny kadalaşdyrýan galkan şekilli mäziň gormonlaryny işläp çykarmak üçin zerur bolan ýoduň ýetmezçiliginiň öwezini dolmaga ýardam berýär.

Ýod we polisaharidler giň biologiki täsirlilige eýedir. Olar saglyga zyýan ýetirmän, rak öýjüklerini ýok etmegi – apoptoz işini girizýärler. Şeýle hem olar oksidantlama we sowuklama garşy hereket edip, erkin zelel ýetirijileri gabamak bilen öýjükleriň zaýalanmagyndan goraýar.

Mundan öň Türkmenistanyň Ylymlar akademiýasynyň Halkara ylmy-tehnologiýalar parkynyň biotehnologiýalar barlaghanasynyň alymlary Hazar deňziniň suwotulardan biomateriallary almagyň täze usulyny işläp düzdüler.