Gazagystanly maýadarlar Türkmenistanyň ykdysadyýetine 16,1 million ABŞ dollary möçberinde maýa goýdular diýip, Gazagystanyň Senatynyň mejlisinde senator Sergeý Ýerşow aýtdy. Bu barada “Kazinform” agentligi penşenbe güni habar berdi.

Mejlisde Gazagystanyň parlamentiniň deputatlary “Gazagystan Respublikasynyň Hökümeti bilen Türkmenistanyň Hökümetiniň arasynda maýa goýumlaryny özara höweslendirmek we goramak hakyndaky Ylalaşygy tassyklamak barada” Kanuny goldadylar.

Senator Amangeldi Nugmanowyň bellemegine görä, bu resminama işewürlik üçin açyk we durnukly şertleri üpjün etmäge, şeýle-de iki döwletiň maýadarlarynyň bähbitlerini goramak boýunça anyk kepillikleri we borçnamalary berkitmäge gönükdirilendir. Ol ilkinji gezek döwletara derejesinde maýa goýum işleriniň döwlet hem-de hususy pudaklarda goldanylmagyna degişli mehanizmleri kesgitleýändigini nygtady.

Şeýle hem hyzmatdaşlygyň möhüm ugry hökmünde energiýa pudagyna aýratyn ähmiýet berilýär. Gazagystan Türkmenistanyň gazkondensat ojaklaryny özleşdirmekde we turbageçiriji infrastrukturasyny ösdürmekde gatnaşmaga taýýardygyny mälim etdi. Mundan başga-da, gaz pudagynda hyzmatdaşlyk boýunça “QazaqGaz” bilen “Türkmengaz” kompaniýalarynyň arasynda aýratyn şertnama baglaşyldy.

2024-nji ýylyň netijeleri boýunça iki ýurduň arasyndaky söwda dolanyşygy 555,7 million ABŞ dollaryna ýetdi. Türkmenistanyň ykdysadyýetine Gazagystandan gönüden-göni daşary ýurt maýa goýumlarynyň möçberi 0,4 million dollar boldy. Taraplar hyzmatdaşlygyň geljekki ugurlary hökmünde ulag pudagyndaky taslamalary, şeýle hem tehniki üpjünçiligi döwrebaplaşdyrmak we abatlamak boýunça bilelikdäki başlangyçlary öňe sürýärler.

Şeýle hem şu ýylyň awgust aýynda Türkmenistanyň Balkan welaýaty bilen Gazagystanyň Mangistau oblasty araçäk sebitleriniň ýaşaýjylary üçin bäş günlük wizasyz geçiş düzgünini dikeltmek başlangyjyny goldadylar.