Türkmenistan, Azerbaýjan we Özbegistan uzak möhletleýin, özara bähbitli hyzmatdaşlygy giňeltmek maksady bilen senagat, söwda-ykdysady, ulag hem-de medeni-ynsanperwer ulgamlarynda bilelikdäki kärhanalary döretmek we bilelikdäki taslamalary durmuşa geçirmek barada ylalaşdylar. Bu karar türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, Azerbaýjan Respublikasynyň Prezidenti Ilham Alyýew hem-de Özbegistan Respublikasynyň Prezidenti Şawkat Mirziýoýew tarapyndan anna güni “Awaza” milli syýahatçylyk zolagynda geçirilen duşuşykda kabul edildi.

Taraplar önümçilik we senagat kooperasiýasyny ösdürmäge üns berdiler hem-de dokma, himiýa, gurluşyk pudaklarynda we beýleki pudaklarda bilelikdäki kärhanalary döretmek arkaly uzak möhletli özara bähbitli hyzmatdaşlygy giňeltmegi ylalaşdylar. Liderler işewürlik gatnaşyklary ýola goýmagyň, sergileri we işewürlik forumlary geçirmegiň, şeýle hem ulag-logistika ulgamynda hyzmatdaşlygyň netijeliligini ýokarlandyrmagyň, multimodal gatnawlary, howa gatnawlaryny we syýahatçylygy ösdürmegiň zerurlygyny tassykladylar. Bu barada Türkmenistanyň resmi metbugaty habar berýär.

Hususan-da, medeni-ynsanperwer hyzmatdaşlyga aýratyn üns berildi, döwlet edaralarynyň, ylmy merkezleriň, okuw jaýlarynyň, metbugatyň we sungat ussatlarynyň özara hyzmatdaşlygy hem-de saparlaryň guralmagy baradaky meseleler ara alnyp maslahatlaşyldy. Duşuşyga gatnaşyjylar bilelikdäki taslamalaryň we çäreleriň amala aşyrylmagynyň üç ýurduň halklarynyň arasyndaky dostlugy we dürli ugurlardaky hyzmatdaşlygy has-da berkidjekdigini bellediler.

Üçtaraplaýyn duşuşygyň ahyrynda ulag, awiasiýa we söwda ulgamlarynda özara hyzmatdaşlygy giňeltmäge gönükdirilen birnäçe resminama gol çekmek dabarasy geçirildi.