Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, Azerbaýjan Respublikasynyň Prezidenti Ilham Aliýew we Özbegistan Respublikasynyň Prezidenti Şawkat Mirziýoýew anna güni Awazada üçtaraplaýyn formatyndaky duşuşyk geçirdiler. Duşuşygyň netijeleri boýunça ulag, awiasiýa hem-de söwda ugurlaryndaky hyzmatdaşlygy giňeltmäge gönükdirilen birnäçe resminamalara gol çekmek dabarasy geçirildi. Bu barada Türkmenistanyň resmi metbugaty habar berýär.

“Türkmenhowaýollary” döwlet gullugy bilen Azerbaýjan Respublikasynyň Sanly ösüş we ulag ministrliginiň arasynda halkara howa gatnawyny mundan beýläkde ösdürmek barada özara düşünişmek hakynda Ähtnama, şeýle hem Arkadag şäheri (Türkmenistan) bilen Fizuli şäheriniň (Azerbaýjan Respublikasy) arasynda doganlyk gatnaşyklaryny ýola goýmak hakynda Teswirnama hem gol çekildi.

Türkmenistan we Özbegistan gämi gurluşygy we raýat awiasiýasy babatda hyzmatdaşlygy ösdürmäge ylalaşdylar. Şeýle hem Türkmenistanyň Döwlet haryt-çig mal biržasy bilen “Özbek respublikan haryt-çig mal biržasy” paýdarlar jemgyýetiniň arasyndaky hyzmatdaşlyk hakynda ylalaşyga gol çekdiler.

Mundan başga-da, Türkmenistanyň Demir ýol ulaglary ministrliginiň, Azerbaýjan Respublikasynyň Sanly ösüş we ulag ministrliginiň hem-de Özbegistan Res­pub­li­ka­sy­nyň Ulag ministrliginiň arasynda ulag-logistika hyzmatdaşlygy babatda özara düşünişmek hakynda Ähtnama gol çekildi.

Sammitiň jemleri boýunça taraplar Bilelikdäki Beýannamasyny kabul etdiler. Onda üçtaraplaýyn hyzmatdaşlygyň mundan beýläk-de ösdürilmeginiň parahatçylygyň we durnuklylygyň üpjün edilmegine, ynamyň we özara düşünişmegiň berkitmäge hyzmat etjekdigi nygtalýar.