Özbegistan Hazar deňzi arkaly ýük daşamagy ösdürmek üçin öz parom gatnawlaryny ýola goýmak isleýändigini mälim etdi. Bu barada Prezident Şawkat Mirziýoýew anna güni “Awaza”milli syýahatçylyk zolagynda geçirilen üçtaraplaýyn duşuşykda aýtdy. Duşuşyga Türkmenistanyň halkynyň milli lideri, Halk Maslahaty Başlygy Gurbanguly Berdimuhamedow we Azerbaýjanyň Prezidenti Ilham Aliýew hem gatnaşdy. Duşuşyk 2025-nji ýylyň 22-nji awgustynda “Awaza” milli syýahatçylyk zolagynda geçirildi.

Özbegistanyň Prezidentiniň metbugat gullugynyň habar bermegine görä, duşuşykda ulag geçelgeleriniň geçirijilik kuwwatyny giňeltmek, şeýle hem häzirki zaman, esasan hem, Türkmenbaşy we Baku portlarynyň logistika infrastrukturasyny ösdürmek meselelerine aýratyn üns berildi.

 Taraplar sazlaşykly nyrh syýasatyny durmuşa geçirmek, sanlylaşdyrma işlerini ösdürmek hem-de ýükleriň hereketine gözegçiligi güýçlendirmek meseleleri boýunça pikir alyşdylar. Özbek tarapy özara ulag nyrhlaryny peseltmäge taýýardygyny beýan etdi, bu bolsa esasy bazarlara amatly bahalar bilen çykmaga mümkinçilik berer. Duşuşygyň barşynda bu ugurda bilelikdäki sazlaşykly iş sebitiň logistikasyny ösdürmäge gyzyklanýan döwletler we halkara guramalar bilen hyzmatdaşlygy ýola goýmaga kömek eder diýip bellenildi.

Duşuşykda sebitde logistikanyň ösüşine goldaw bermäge taýýar döwletler we halkara guramalar bilen hyzmatdaşlygyň giňeldilmegine birleşdirilen çemeleşme üsti bilen şert döredilýändigi aýratyn bellenildi.

Energetika ulgamynda hyzmatdaşlygyň çuňlaşdyrylmagy, eksport geçelgeleriniň ösdürilmegi boýunça hem pikir alşyldy. Şol sanda Ýewropa ýurtlaryna "ýaşyl" energiýanyň iberilişi, Hazar deňziniň kenarýakasynda geologiýa-gözleg we känleriň özleşdirilişi boýunça hyzmatdaşlyk mümkinçilikleri ara alnyp maslahatlaşyldy.

Hazar deňzi arkaly ýük daşamalary sebitiň halkara logistika ulgamynyň möhüm bölegini düzýär we Merkezi Aziýa, Eýran, Russiýa hem-de Kawkaz ýurtlaryny birleşdirýär. Ýewraziýa ösüş bankynyň çaklamalaryna görä, 2030-njy ýyla çenli bu geçelge arkaly ýük daşamalarynyň möçberi 25–32 million tonna ýetmegi mümkin.