2025-nji ýylyň 22-nji awgustynda Türkmenistanyň "Awaza" milli syýahatçylyk zolagynda “Azerbaýjan – Türkmenistan – Özbegistan” üçtaraplaýyn duşuşyk geçirildi. Duşuşyga türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow, Özbegistan Respublikasynyň Prezidenti Şawkat Mirziýoýew hem-de Azerbaýjan Respublikasynyň Prezidenti Ilham Alyýew gatnaşdylar.

Taraplar söwda-ykdysady, ulag, energetika we ynsanperwer ugurlarda köptaraplaýyn hyzmatdaşlygy ösdürmek meselelerini ara alyp maslahatlaşdylar. Özbegistanyň Prezidentiniň resmi metbugat gullugynyň habar bermegine görä, duşuşykda üç ýurduň üstaşyr mümkinçiliklerini netijeli peýdalanmagyň hem-de Hytaýy Günorta Aziýa, Ýakyn Gündogar we Ýewropa bilen baglanyşdyrýan durnukly transkontinental geçelgäni döretmegiň ähmiýeti aýratyn nygtaldy.

Duşuşykda Orta geçelgäniň şol sanda Zangezur geçelgesiniň ösüşi, ýurtlaryň arasyndaky söwda dolanyşygynyň giňeldilmegi, senagat hyzmatdaşlygynyň ösdürilmegi, lomaý-paýlaýyş merkezleriniň döredilmegi, önümleriň sanly bellige alynmagy we umumy elektron platformalaryň ornaşdyrylmagy bilen bagly meýilnamalar ara alnyp maslahatlaşyldy.

Ynsanperwer ulgamda bolsa syýahatçylyk we medeni alyş-çalyşlaryň üçtaraplaýyn maksatnamasyny döretmek teklip edildi. Gazanylan ylalaşyklary iş ýüzünde amala aşyrmak maksady bilen, “ýol kartasyny” taýýarlamak we hyzmatdaşlygyň möhüm ugurlary boýunça ministrleriň yzygiderli duşuşyklaryny geçirmek teklip edildi.

Duşuşygyň ahyrynda “Azerbaýjan – Türkmenistan – Özbegistan” görnüşindäki hyzmatdaşlygyň çäklerinde resminamalaryň gol çekmek dabarasy geçirildi.