Türkmen telekeçileri 2025-nji ýylyň 23-25-nji sentýabr aralygynda Daşkent şäherinde geçiriljek plastmassa senagaty boýunça “Plastex Uzbekistan” atly 15-nji halkara sergisine gatnaşmaga çagyrylýar. Bu barada Türkmenistanyň Söwda-senagat edarasy habar berýär.

Sergi plastmassa we polimer önümçiliginde iň täze tehnologiýalaryň, enjamlarynyň hem-de çözgütleriň görkeziljek meýdançasyna öwrüler diýip, çäräniň resmi saýtynda bellenilýär.

2025-nji ýyldan başlap Plastex Uzbekistan sergisi täze, giňeldilen görnüşde geçiriler. Ol 4P Central Asia atly sergi bilen bilelikde guralyp, poligrafiýa, gaplama, plastmassa we polimer pudaklaryny birleşdirýär. Bu görnüş sergä gatnaşyjylara şol ugurlaryň tehnologiýalary, çig mallary we serişdeleri barada giň we doly düşünje almaga mümkinçilik berýär.

Serginiň gatnaşyjylary innowasion önümlerini görkezmäge, ýerli we daşary ýurt kompaniýalarynyň tekliplerini seljermäge hem-de täze iş hyzmatdaşlyklaryny ýola goýmaga giň mümkinçilik alarlar.

"Plastex Uzbekistan 2024" 14-nji halkara sergisi geçen ýylyň 2–4-nji oktýabrynda Taşkentde geçirildi.