Türkmenistanyň Ministrler Kabinetiniň Başlygynyň orunbasary Nökerguly Atagulyýew Russiýanyň Altaý Respublikasynda geçirilýän Halkara ekologiýa maslahatynda çykyş edip, ýurduň daşky gurşawy goramak diplomatiýasyna hem-de durnukly ösüşe ygrarlylyny tassyklady. Bu barada penşenbe güni Türkmenistanyň resmi metbugaty habar berdi.

Nökerguly Atagulyýew çykyşynda Türkmenistanyň BMG-niň biologik köpdürlülik barada Konwensiýasy, BMG-niň çölleşmä garşy göreş baradaky Konwensiýasy, howanyň üýtgemegi baradaky Pariž Ylalaşygy we Ýitip gitmek howpy astynda durýan ýabany flora we fauna görnüşleriniň halkara söwdasy hakyndaky Konwensiýa (CITES) ýaly möhüm halkara tebigaty goramak şertnamalarynyň birnäçesine gatnaşýandygyny belledi.

Tebigaty goramak boýunça amala aşyrylan başlangyçlaryň çäklerinde soňky 20 ýylda ýurtda 162 milliondan gowrak agaç ekildi, şeýle hem aýratyn goralýan tebigy ýerleriň geriminiň giňeldilmegi boýunça uly işler alnyp baryldy. Häzirki wagtda bu ulgama 9 sany döwlet goraghanasyny we 16 sany çäkli goraghanany öz içine alýar. Mundan başga-da, Türkmenistan suw tygşytlaýjy tehnologiýalaryň ornaşdyrylmagyny işjeň goldaýar we serhetara suw serişdelerinden rejeli peýdalanmak ugrunda çykyş edýär.

Çykyşynyň ahyrynda Nökerguly Atagulyýew 2025-nji ýylda Türkmenistan hemişelik Bitaraplygynyň 30 ýyllygyny belläp geçjekdigini ýatlatdy hem-de ýurduň halkara ekologiýa hyzmatdaşlygyny giňeltmäge we global meseleleriň durnukly çözgütlerini bilelikde tapmaga taýýardygyny ýene-de bir gezek tassyklady.