Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Balkan welaýatyna iş saparynyň çäklerinde "Awaza” milli syýahatçylyk zolagyndaky käbir myhmanhanalaryň geçiriljek çärelere taýýarlyk derejesi we olarda döredilen şertler bilen tanyşdy. Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyna gatnaşyjylar üçin ýokary derejeli ýaşaýyş we oňaýly dynç alyş üçin ähli zerur şertleriň döredilmegine aýratyn üns berildi. Bu barada Türkmenistanyň resmi metbugaty çarşenbe güni habar berdi.

Türkmenistanyň Halk Maslahatynyň Başlygy myhmanhanalaryň otaglaryny gözden geçirdi we hyzmatlaryň ýokary derejesini üpjün etmegiň, şeýle-de milli myhmansöýerlik däplerine eýermegiň zerurdygyny aýratyn belledi. Myhmanlaryň rahatlygy bilen bagly ähli meseleleriň göz öňünde tutulmalydygy, myhmanhanalaryň ýanaşyk ýerlerini bolsa degişli tertipde saklanylmalydygy nygtaldy. 

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow degişli ýolbaşçylaryň gatnaşmagynda iş maslahatyny hem geçirdi. Onuň dowamynda halkara foruma çenli az wagtyň galandygyny nazara alyp, ýerine ýetirilýän işleriň depginini ýokarlandyrmak bilen baglanyşykly meseleler ara alnyp maslahatlaşyldy.

Şeýle hem köpçülikleýin habar beriş serişdelerinde öňde boljak halkara forumyň taryhy ähmiýeti barada aýratynlykda ara alnyp maslahatlaşyldy. Gurbanguly Berdimuhamedow öňde boljak taryhy ähmiýetli çäräniň köpçülikleýin habar beriş serişdelerinde işjeň beýan edilmeginiň möhümdigini nygtady. Milli tele we radio ýaýlymlarda, internet saýtlarynda we elektron neşirlerde forumyň dowamynda çykýan habarlary gündelik esasda giňden şöhlelendirmek tabşyryldy.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Balkan welaýatyna iş saparynyň çäklerinde Awaza” milli syýahatçylyk zolagynda ýerleşýän Kongresler merkezine bardy. Bu desga, Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň (LLDC3) esasy meýdançalarynyň biri bolup çykyş eder.

Türkmen halkynyň Milli Lideri geçiriljek çäreler üçin binalaryň taýýarlyk derejesine zerur üns bermegiň wajypdygyny, olaryň konferensiýanyň ýokary derejesine laýyk gelmelidigini aýratyn belledi. Şeýle hem, otaglaryň döwrebap enjamlar bilen üpjün edilmegine, daşary ýurtly wekilleriň hem-de köpçülikleýin habar beriş serişdeleriniň wekilleriniň iş alyp barmagy üçin ähli zerur şertleriň döredilmegine aýratyn üns berildi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Balkan welaýatyna iş sapary dowam edýär.