Russiýa bilen Türkmenistan bilelikdäki uniwersiteti döretmek boýunça hökümetara ylalaşyga gol çekmäge taýýarlyk görýär. Bu barada Russiýanyň daşary işler ministri Sergeý Lawrow Türkmenistanyň Daşary işler ministrliginiň Halkara gatnaşyklary institutynda eden çykyşynda aýtdy. Bu barada TASS agentligi berdi.

“Ýakyn wagtda giň gerimli taslamany türkmen-rus uniwersitetini döretmegi meýilleşdirýäris. Şu gün men kärdeşim we dostum Raşid Meredow bilen degişli hökümetara ylalaşygy taýýarlamak boýunça görülýän çäreleri ara alyp maslahatlaşdym” diýip, Sergeý Lawrow belledi.

Russiýanyň daşary işler ministri iki ýurduň arasyndaky gatnaşyklarda ynsanperwer hyzmatdaşlygyň ähmiýetine ünsi çekip, Türkmenistanyň rus diline, edebiýatyna we medeniýetine bildirýän gyzyklanmasy üçin minnetdarlyk bildirdi. Şeýle hem ol Aşgabatda rus drama teatrynyň meşhurlygyny we Puşkin adyndaky bilelikdäki mekdebiň üstünlikli işini aýratyn nygtady.

“Russiýada türkmen dili uniwersitetlerde hem-de türkmenleriň köp ýaşaýan sebiti bolan Astrahan oblastyndaky ýöriteleşdirilen mekdepde öwrenilýär” diýip, ilçi sözüniň üstüni ýetirdi.

Sergeý Lawrow çarşenbe güni resmi sapar bilen Aşgabada geldi. Şol gün onuň Türkmenistanyň Prezidenti Serdar Berdimuhamedow bilen duşuşygy hem-de daşary işler ministri Raşid Meredow bilen gepleşikleri geçirildi.