Täze 3D wirtual syýahat dünýäniň islendik künjegindäki ulanyjylara görnükli türkmen şahyry we gündogar pelsepeçisi Magtymguly Pyragynyň heýkeli oturdyllan Kiýewiň merkezindäki seýilgähde gezelenç etmäge mümkinçilik berýär. Bu barada Türkmenistanyň Ukrainadaky Ilçihanasy habar berdi.

Ilçihananyň binasynyň golaýynda ýerleşýän bu ýadygärlik eýýäm iki onýyllykdan gowrak wagt bäri türkmen medeniýetine we edebiýatyna goýulýan hormatyň nyşany bolup hyzmat edýär. Şeýle hem ol Türkmenistanyň we Ukrainanyň halklarynyň arasyndaky dostlugyň alamatydyr.

Interaktiw syýahat “Google Maps” platformasy arkaly elýeterlidir. Ulanyjylar seýilgähde wirtual gezelenç edip, heýkeli ýakyndan synlap bilerler. Bu taslama Medeniýet we sungat işgärleriniň güni hem-de Türkmenistanda her ýyl 27-nji iýunda bellenilýän Magtymguly Pyragynyň şygyrýet güni mynasybetli guraldy.

Howanyň gyzyp başlan möwsüminde seýilgähiň gözelligine aýratyn öwüşgin berýän Türkmenistanyň Döwlet tugrasynyň nyşany şekilinde oturdylan gülleriň aýratyn owadanlygy bellärliklidir. Bu bolsa ýurdumyzyň milli nyşanlaryna çuňňur hormat goýmagyň alamatydyr.