Germaniýa Federatiw Respublikasynyň Frankfurt şäherinde halkara derejeli “Türkmenistanyň Ykdysadyýetiniň günleri” forumy üstünlikli tamamlandy. Çäräniň maksady Türkmenistanyň hem-de Germaniýanyň arasynda, şeýle hem Ýewropa Bileleşiginiň beýleki ýurtlary bilen söwda-ykdysady we maýa goýum hyzmatdaşlygyny ösdürmekden ybarat boldy.

Forumyň guramaçylary hökmünde Türkmenistanyň Söwda-senagat edarasy hem-de hyzmatdaş guramaçysy hökmünde TMT Consulting Group kompaniýasy çykyş etdiler. Çäräniň geçirilmegine Türkmenistanyň Frankfurtdaky Konsullygy we Germaniýanyň Gündogar ykdysadyýeti boýunça komiteti hem işjeň goldaw berdiler.

Foruma Türkmenistanyň döwlet edaralaryndan 43 hem-de hususy pudakdan 63 wekil gatnaşdy. Mundan başga-da, Germaniýadan we beýleki Ýewropa ýurtlaryndan 126 sany daşary ýurtly myhmanlar foruma gatnaşdylar.

Çäre 70-den gowrak german kompaniýalarynyň we senagat birleşikleriniň, şeýle hem 55 türkmen kompaniýalarynyň hem-de degişli ministrlikleriň we pudak edaralarynyň wekilleri gatnaşdylar. Çäräniň dowamynda plenar mejlis, dört mowzuklaýyn panel maslahatlary, 86 sany B2B we 38 sany B2G duşuşyk geçirildi, şeýle hem 12 sany ikitaraplaýyn ylalaşyklara we Ähtnamalara gol çekildi.

Forumyň baş hemaýatkärleri hökmünde "Ojar Aziýa" hem-de "John Deere" kompaniýalarnyň çykyş etmegi bu çäreniň ýokary derejesini we ähmiýetini açyp görkezdi we öňdebaryjy işewür düzümleriň Türkmenistan bilen Ýewropa ýurtlarynyň arasyndaky hyzmatdaşlygyň pugtalandyrylmagyna bolan taýýarlygyny beýan etdi.