Türkmen-owgan döwlet serhedinde ýerleşýän “Serhetabat” gümrük nokadynyň durkuny täzelemek boýunça gurluşyk işleri başlandy. “Serhetabat” gümrük nokady Türkmenistanyň daşary söwdasynyň haryt dolanşygynda hem-de “Lapis Lazuli” we başgada birnäçe halkara ulag geçelgeleriniň ugry boýunça üstaşyr ýükleriň geçirilmeginde uly ähmiýetli gümrük nokatlarynyň biri bolup durýar.

Gurluşyk işleri “Sapaly geljek” hojalyk jemgyýeti tarapyndan 2025-2027-nji ýyllar aralygynda ýerine ýetiriler. Gurluşyk işleriniň barşynda öňki hereket edýän binalaryň durky düýpli täzelener, birnäçe täze binalar we desgalar gurlar. 

Şeýle hem, taslamanyň çäklerinde ulag serişdeleri üçin täze rentgen-barlag enjamyny gurnamak hem-de gümrük amallary üçin sanly ulgamyň mümkinçiliklerini giňden ornaşdyrmak meýilleşdirilýär.

Işleriň netijesinde bolsa, gümrük nokadynyň ulag geçirijilik kuwwatyny bir günde jemi 500 awtoulaga çenli ýokarlandyrmak göz öňünde tutulýar. Bu bolsa gümrük nokadynyň häzirki taslama kuwwatyndan 2,5 esse ýokarydyr. 

Taslamanyň üstünlikli amala aşyrylmagy ýurduň logistika ulgamynyň mümkinçiliklerini giňelder hem-de Türkmenistanyň üsti bilen geçirilýän üstaşyr ýükleriň möçberiniň artmagyna güýçli itergi berer.