Balkan welaýatynyň häkimi Hojamyrat Aşyrmyradow penşenbe güni Aktau şäherinde Gazagystanyň Mangistau oblastynyň häkimi Nurdaulet Kylybaý bilen duşuşdy. Duşuşygyň dowamynda taraplar serhetýaka welaýatlaryň ýaşaýjylary üçin bäş günlük wizasyz düzgünini dikeltmek başlangyjyny goldadylar.

Taraplaryň pikirine görä, bu başlangyç ynsanperwer, medeni we ykdysady gatnaşyklary has-da berkitmäge ýardam eder, diýip oblastyň häkimligi habar berýär.

Duşuşygyň barşynda 2025–2027-nji ýyllar üçin strategik hyzmatdaşlygy ösdürmegiň maksatnamalary hem ara alnyp maslahatlaşyldy.

“Biz Mangistau oblastynyň Balkan welaýaty bilen ähli ugurlar boýunça hyzmatdaşlygyny goldamaga taýýar. Nebitgaz, logistika, oba-hojalyk, medeniýet we syýahatçylyk pudaklarynda hyzmatdaşlyk üçin uly mümkinçilikler bar”— diýip Nurdaulet Kylybaý belledi.

Duşuşygyň ahyrynda taraplar sebitara hyzmatdaşlygy has-da ösdürmäge gönükdirilen taslamalary bilelikde durmuşa geçirmegi ylalaşdylar.

Mangistau oblasty Gazagystanyň gündogarynda, Hazar deňziniň kenarynda ýerleşýär we Türkmenistan bilen serhetleşýär. Sebit ýurduň nebit-gaz pudagynda möhüm orun eýeleýär hem-de Aktau deňiz porty arkaly esasy ulag-logistika nokady bolup hyzmat edýär.