BMG-niň Baş sekretary Antoniu Guterriş Türkmenistanyň Prezidenti Serdar Berdimuhamedowyň adyna ýollan hatynda, 2025-nji ýylyň 5–8-nji awgustynda “Awaza” milli syýahatçylyk zolagynda geçirilen BMG-niň Deňze çykalgasy bolmadyk ösüp barýan ýurtlar boýunça üçünji maslahatyny (LLDC3) ýokary derejede guranandygy üçin minnetdarlyk bildirdi. Bu barada Türkmenistanyň resmi metbugaty çarşenbe güni habar berdi.

Guterriş Türkmenistanyň parahatçylykly ösüşe, bitaraplyga we köptaraplaýyn dialoga esaslanýan yzygiderli daşary syýasatynyň halkara forumynyň üstünlikli geçirilmegine berk binýat bolandygyny belledi. Ol LLDC3 maslahatynyň döwlet we hökümet Baştutanlaryny, halkara guramalaryň wekillerini, raýat jemgyýetini we habar beriş serişdelerini birleşdirip, deňze çykalgasy bolmadyk ösüp barýan döwletleriň durnukly ösüşini gazanmak we olaryň dünýä meselelerine garşy durmak ukybyny güýçlendirmek ugrunda umumy gün tertibine hyzmat edendigini nygtady.

Diplomat şeýle hem özüne we onuň wekiliýetine Türkmenistanda görkezilen myhmansöýerlik üçin minnetdarlyk bildirip, maslahatda kabul edilen çözgütleriň ýerine ýetirilmeginde hyzmatdaşlyga taýýardygyny tassyklady.

LLDC3 forumyna 100-den gowrak daşary ýurduň döwlet we hökümet ýolbaşçylary, 50-ä golaý halkara guramalaryň wekilleri, dünýäniň 20-den gowrak  öňdebaryjy kompaniýasynyň ýolbaşçylary gatnaşdy. Bu möhüm halkara çäräni giňden beýan etmek maksady bilen, 40-a golaý döwletden 160-dan gowrak köpçülikleýin habar beriş serişdeleriniň wekilleri Awaza geldi.