Türkmen telekeçileri 2025-nji ýylyň 11–13-nji noýabry aralygynda Daşkentde geçiriljek “TransLogistica Uzbekistan” sergisine çagyrylýar diýip, Türkmenistanyň Söwda-senagat edarasy habar berýär.

Sergi logistika ulgamlaryny kämilleşdirmäge, ulag infrastrukturasyny ösdürmäge, ulag we logistika ugurlarynda IT-tehnologiýalaryny ornaşdyrmaga, maýa goýumlary çekmäge hem-de Merkezi Aziýada ýük gatnawlarynyň möçberini artdyrmaga ýardam eder. Bu barada serginiň web sahypasynda aýdylýar.

Sergide ýük daşamagyň ähli görnüşleri, terminallaryň we portlaryň işi, intermodal we ýöriteleşdirilen gatnawlar, ammarlaryň logistikasy, demir ýol we awtoulag serişdeleri, ýükleri saklamak we barlamak ulgamlary, gaplama we sargytlary ýerine ýetirmek, ammarlaryň awtomatlaşdyrylan ulgamlary we logistika üçin inženerçilik çözgütleri görkeziler.

Türkmen telekeçileri şol günlerde Daşkentde geçiriljek “E-TechExpo 2025” sergisine hem çagyrylýar. Serginiň esasy ugurlary elektronika, robot tehnikasy we awtomatizasiýa, dolandyryş ulgamlary hem-de sanly çözgütlerdir.