2025-nji ýylyň 22-nji awgustynda Türkmenistanyň Özbegistan Respublikasyndaky Adatdan daşary we Doly ygtyýarly ilçisi Şadurdy Meredow Daşkent şäherinde Özbegistanyň saglygy goraýyş ministri Asylbek Hudaýarow bilen duşuşyk geçirdi. Duşuşygyň dowamynda “Arkadag Medisina Klasteri Menejment” kärhanasy bilen hyzmatdaşlyk meselelerine, şeýle hem türkmen wekiliýetleriniň Özbegistana saparlaryny guramak arkaly ýerli hünärmenler we telekeçiler bilen göni gatnaşyklary ýola goýmagyň mümkinçiliklerine garaldy. Bu barada Özbegistanyň Saglygy goraýyş ministrligi habar berýär.

Taraplar bilelikde lukmanlary taýýarlamak, ylmy mümkinçilikleri ösdürmek hem-de derman serişdeleriniň hiline gözegçilik etmek boýunça tejribe alyşmak meselelerini ara alyp maslahatlaşdylar. Şeýle hem lukmançylykda innowasion tehnologiýalaryň ornaşdyrylmagyna aýratyn üns berildi.

Türkmenistanyň ilçisi Şadurdy Meredowyň Özbegistanyň saglygy goraýyş ministri Asylbek Hudaýarow bilen duşuşygy, 2025-nji ýylyň 22-nji awgusty, Daşkent, Özbegistan (Surat: Özbegistanyň Saglygy goraýyş ministrligi)

Duşuşygyň dowamynda ylmy-amaly çäreleriň — maslahatlaryň, forumlaryň, treningleriň we ussatlyk sapaklarynyň bilelikde geçirilmegi tassyklandy.

Taraplar gepleşikleriň ahyrynda saglygy goraýyş pudagyndaky hyzmatdaşlygy giňeltmegi we pugtalandyrmagy maslahatlaşdylar.

“Arkadag Medisina Klasteri” kärhanasy ilatyň saglygyny goramak ugrunda dünýäniň öňdebaryjy tejribelerine esaslanyp, farmasewtika serişdelerini, lukmançylyk tehnologiýalaryny we enjamlaryny işläp taýýarlamak hem-de bu ugurda döwrebap bilimi üpjün etmek boýunça ylmy-barlag işlerini alyp barmaga gönükdirilen innowasion taslamadyr.